التسويق الشعبي .. دكانة الحجي الإفتراضية
بهاد الوقت تحديداً وفينا نقول مع بدايات عام ال 2020
انتشرت عنا ظاهرة التسويق الشعبي وبـ لغة مختلفة تماما عن التسويق الإلكتروني بمراحله وخطواته او حتى بالمستوى التقني العالي يلي منتبعه مثلا لنوصل فكرة او عرض لناس كتير و بأسرع وقت
شو يعني تسويق شعبي ؟
التسويق الشعبي ببساطة هوي انك تنقل واقع عملك او محلك او تجارتك
وبما يسمى اليوم البراند brand
الى وسائل التواصل الاجتماعي بس عطريقة الحجي صاحب الشغل !
كيف يعني ؟؟
يعني بالمختصر .. صاحب الحملة او المنتج بيحاول ينشر و يوصل هشي بطرق مرئية او حتى صورية على أمل انو يتوسع وينتشر للأصدقاء و لأصدقاء تشاركو مع الأهل يعني (بالمعية و المونة شاركلنا هل المقطع)
واغلب هي الصفحات نجحت بشكل كبير وقدرت توصل للملايين باشكال كتير يعني ببث مباشر او تسجيل فديو عفوي او حتى منشور بسيط لا يتجاوز السطرين او بعروض حقيقة او لا ..
طيب,شو هيي الأسس يلي بيعتمد عليها التسويق الشعبي او المسوق؟
بيعتمد التسويق الشعبي بشكل اساسي على الجمهور المستهدف وبداياته بتكون بلأهل و الاصدقاء وجيرانا بالسوق ..
توجيه اعلانات و دعايات وحتى عروض غير حقيقية يعني خلبية لشد رجل
التاثير على الجمهور من ناحية العواطف وهاد الاساس بالتسويق
الضحك و المزح ضمن المحتوى
طبعاً هي النتائج لح تتطور كتير والحجي لح ينبسط بالـ income
ولح يكون بعيد كل البعد عن التصاميم و دراسة المحتوى و التاثير بالفكر و الذكاء العاطفي و قيادة الفريق و توزيع المهام
ولح يضل راسو مرتاح طول ما الدكانه الافتراضية شغالة وعم تجيب مصاري
لهيك انت اليوم كـ مسوق او تبع تسويق خليك عشر ساعات عم تفكر كيف تعمل content ..
ملاحظة : انا ضد هي الفكرة بشكل لا بأس فيه .. لانها مؤقته ولح يجي يوم و الحجي يبيع الدكانه او يغير البراند تبعه ولح يضطر يدور على جمهور جديد
